१९ चैत २०८२ कोहलपुर ; – सवारी दुर्घटनामा टाउकोमा गम्भीर चोट लागेका एक बिरामीको सफल उपचारपछि उनले आफ्नो ज्यान बचाउने डाक्टरको फोटो टी–सर्टमा छापेर अस्पताल पुगेको दृश्यले सम्पूर्ण स्वास्थ्य क्षेत्रलाई भावुक बनाएको छ।
नेपालगन्ज मेडिकल कलेज शिक्षण अस्पताल, कोहलपुरमा न्युरो सर्जन डा. सुबोध गौतमको नेतृत्वमा गरिएको जटिल अपरेसनपछि बिरामीले पूर्ण स्वास्थ्य लाभ गरेका हुन्। निको भएपछि उनी डा. गौतमको तस्बिर अंकित टी–सर्ट लगाएर अस्पताल पुगे, जहाँ उनले आफ्नो जीवनदातासँग भेट गरी आभार व्यक्त गरे।
डा. सुबोध गौतम नेपालकै चर्चित न्युरो सर्जनमध्ये एक हुन्। उनको दक्षता, अथक मेहनत र समर्पणले एक परिवारको सारा सुख फर्काइदिएको स्थानीयले बताए।
बिरामीले टी–सर्टमै डाक्टरको फोटो राखेर सम्मान जनाउनु स्वास्थ्यकर्मीप्रतिको विश्वास र कृतज्ञताको जीवन्त उदाहरण हो। यस्तो दृश्यले चिकित्सा सेवा मात्र पेसा नभई मानव जीवन बचाउने महान कर्तव्य भएको पुष्टि गर्छ।
अस्पताल प्रशासनले पनि डा. गौतम र सम्पूर्ण मेडिकल टोलीको प्रशंसा गर्दै यस्ता समर्पित चिकित्सक समाजका साँचो हिरो भएको प्रतिक्रिया दिएको छ।
