२०८२ बर्दिया, असार ३२ –
पूर्वघोषित चरणबद्ध संघर्ष कार्यक्रम अन्तर्गत नेकपा (बहुमत) निकट अखिल (क्रान्तिकारी) कर्णाली प्रदेश समितिले आज बर्दियामा प्रधानमन्त्री र शिक्षामन्त्रीको पुत्ला दहन गरेको छ। कार्यक्रम आगामी श्रावण २ गते हुने देशव्यापी शैक्षिक हडताललाई सफल बनाउन आयोजित गरिएको बताइएको छ।

पुत्ला दहनमा सहभागी विद्यार्थीहरूले सरकारप्रति आक्रोश व्यक्त गर्दै शिक्षाको निजीकरण र व्यापारीकरण तीव्र रूपमा बढेको आरोप लगाए। उनीहरूले शिक्षालाई नाफामूलक व्यापारको रूपमा प्रयोग गरिँदै आएको भन्दै यसको गहिरो विरोध गरे। विद्यार्थीहरूको भनाइमा, संविधानको भाग ३ अन्तर्गत धारा ३१ ले प्रत्येक नागरिकको शिक्षामा पहुँच सुनिश्चित गरे पनि सरकार आफैँले त्यो मौलिक हकलाई लत्याउँदै आएको छ।

उनीहरूले जनताको शिक्षा प्रणालीलाई थप सुदृढ बनाउनुपर्ने माग गर्दै राज्य शासकहरू शैक्षिक माफिया र निजी संस्थाको संरक्षणमा लागेको आरोप समेत लगाए। पुत्ला दहन कार्यक्रम शिक्षाको व्यापारीकरणविरुद्धको जनआन्दोलनको एउटा प्रतीकका रूपमा गरिएको हो। उनीहरूका अनुसार राज्यद्वारा जनपक्षीय शिक्षा ऐन ल्याउने काममा खासै गम्भीरता देखिएको छैन, बरु शैक्षिक नीतिहरू निजी नाफा कमाउनेहरूको हितमा निर्माण भइरहेका छन्।

कार्यक्रममा सहभागी एक विद्यार्थी नेताले भने, “हामी शिक्षालाई व्यापारीकरणको बाटोमा हिँड्न दिनेछैनौं। यो जनताको अधिकार हो, लाभको साधन होइन। राज्यले तत्काल जनपक्षीय शिक्षा ऐनको तयारी थाल्नुपर्छ।”

शान्तिपूर्ण रूपमा सम्पन्न भएको यस कार्यक्रमले अबको दिनहरूमा शिक्षा प्रणालीप्रति अझ व्यापक बहस र विरोध चर्किने संकेत गरेको छ। श्रावण २ गतेको शैक्षिक हडताललाई देशभरका क्याम्पस, स्कूल, विश्वविद्यालयहरूमा प्रभाव पार्ने गरी तयारी भइरहेको अखिल (क्रान्तिकारी) कर्णाली प्रदेश समितिले जनाएको छ।