राष्ट्रिय स्वतन्त्र पार्टी (रास्वपा) का वरिष्ठ नेता तथा झापा क्षेत्र नम्बर ५, का उम्मेदवार बालेन्द्र साह (बालेन) माथि गोली प्रहार भन्दै अफवाह फैलाउने युवक समातिएका छन् ।
कञ्चनपुरको शुक्लाफाँटा नगरपालिका–७, बस्ने २३ वर्षीय प्रकाश भट्ट उक्त अभियोगमा पक्राउ परेका हुन् । उनले सामाजिक सञ्जाल टिकटकमा ‘झापामा बालेन साहमाथि गोली प्रहार’ भन्दै पोष्ट गरेका थिए ।
भट्टलाई काठमाडौं महानगपालिका–५, डबली चोकबाट नियन्त्रणमा लिइएको जिल्ला प्रहरी परिसरले जनाएको छ । उनीमाथि सार्वजनिक शान्तिविरुद्धको कसुरमा स्थानीय प्रशासनबाट पाँच दिनको म्याद अनुमति लिई अनुसन्धान भइरहेको प्रहरीले जनाएको छ ।
