नेपालगञ्ज — बाँके जिल्ला ट्राफिक प्रहरी कार्यालयले आर्थिक वर्ष २०८१/८२ मा ट्राफिक नियम उल्लंघनका घटनामार्फत सवा ३ करोड रुपैयाँभन्दा बढी राजश्व संकलन गरेको छ। प्रहरी निरीक्षक पुष्कर पन्तका अनुसार साउनदेखि असार मसान्तसम्मको अवधिमा ३ करोड २६ लाख ७ हजार ५ सय रुपैयाँ बराबरको राजश्व सङ्कलन गरिएको हो।
यो अवधिमा ट्राफिक नियम विपरीत सञ्चालनमा आएका सवारीसाधनहरूमाथि व्यापक निगरानी र कारबाही गरिएको थियो। एक वर्षभित्र ३७ हजार ४३५ वटा सवारीसाधनलाई कारबाही गरिएको जनाइएको छ। ट्रक, टिपर, बस, मिनीबस, जिप, मोटरसाइकल, ट्याक्टर र टेम्पो जस्ता सवारीसाधनहरू यस अभियानमा समेटिएका थिए।
कारबाहीबाट संकलित राजश्वमध्ये सबैभन्दा धेरै हिस्सा मोटरसाइकलतर्फबाट उठेको छ। ट्रक–टिपर, बस, जिप, ट्याक्टर र टेम्पोहरूबाट पनि उल्लेख्य रकम संकलन भएको विवरण प्रहरीले सार्वजनिक गरेको छ। पन्तका अनुसार ट्राफिक नियम उल्लंघनमा कडाइ गर्दा सडकमा अनुशासन कायम राख्न मद्दत पुगेको छ।
साथै, जिल्लामा सवारी दुर्घटनाको संख्या पनि चिन्ताजनक देखिएको छ। एक वर्षको अवधिमा ८५२ वटा सवारी दुर्घटना भएका छन्, जसमा ७० जनाले ज्यान गुमाएका छन्। मृत्यु हुनेमध्ये पुरुषको संख्या सबैभन्दा बढी रहेको छ भने महिलासहित बालबालिकाहरूको पनि दुःखद निधन भएको छ। दुर्घटनामा सयौं नागरिक घाइते भएका छन्, जसमा केही गम्भीर र केही सामान्य चोटपटकसहित अस्पताल भर्ना भएका थिए।
मोटरसाइकल दुर्घटनाको संख्या सबैभन्दा उच्च देखिएको छ। चौपाया सवारी दुर्घटनामा पनि उल्लेख्य वृद्धि देखिएको प्रहरीले जनाएको छ। यस्ता घटनाहरूको न्यूनीकरणका लागि सचेतना र प्रविधि दुवैको समन्वयमा काम गरिनुपर्ने देखिन्छ।
ट्राफिक प्रहरीले एक वर्षमा २५५५ वटा ट्राफिक सचेतना कार्यक्रम सञ्चालन गरेको जनाएको छ। ती कार्यक्रमहरूबाट दुई लाखभन्दा बढी सर्वसाधारणले प्रत्यक्ष लाभ लिएका छन्। विभिन्न विद्यालय, कार्यालय र सार्वजनिक स्थानमा सञ्चालन गरिएका ती कक्षाहरूमा नियम पालनाको महत्त्व, सवारी प्रयोगका सावधानी, चालकको स्वास्थ्य जाँच, र आँखासम्बन्धी शिविरजस्ता विषय समेटिएका थिए।
ट्राफिक प्रमुख पन्तका अनुसार यस्ता सचेतनामूलक प्रयासले सवारी दुर्घटना र नियम उल्लंघनमा कमी ल्याउन सहयोग पुग्ने विश्वास गरिएको छ। उनले जिल्लाका विभिन्न ठाउँमा नागरिक सुनुवाइ कार्यक्रमसमेत सञ्चालन गरिएको जानकारी दिए।
